ភ្នំពេញ៖ រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក វង សូត បានអញ្ជើញគោរពវិញ្ញាណក្ខន្ធសពអនុប្រធានទី១ នៃរដ្ឋសភា លោក ងួន ញ៉ិល ដែលបានទទួលមរណភាពកាលពីព្រឹកថ្ងៃទី៥ ខែវិច្ឆិកា។
លោករដ្ឋមន្ត្រី អញ្ជើញទៅគោរពវិញ្ញាក្ខន្ធដោយផ្ទាល់ នៅគេហដ្ឋាននៃសពក្នុងភូមិអូរអណ្តូង សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។នៅព្រឹកថ្ងៃទី៧ ខែវិច្ឆិកា ឆ្នាំ២០២១នេះ។
អនុប្រធានទី១ នៃរដ្ឋសភា លោក ងួន ញ៉ិល បានទទួលមរណភាពកាលពីថ្ងៃទី៥ ខែវិច្ឆិកា ឆ្នាំ២០២១ ដោយរោគាពាធ ក្នុងជន្មាយុ ៧៩ឆ្នាំ។
លោករដ្ឋមន្ត្រី វង សូត បានសម្ដែងការសោកស្ដាយជាទីបំផុតជាមួយក្រុមគ្រួសារសព និងបានចាត់ទុកមរណៈភាពរបស់ លោក ងួន ញ៉ិល មិនត្រឹមតែជាការបាត់បង់លោកឪពុក លោកឪពុកក្មេក និងជីតាប្រកបដោយព្រហ្មវិហារធម៌ និងជាទីគោរពស្រឡាញ់យ៉ាងខ្លាំងបំផុតនោះទេ តែក៏ជាការបាត់បង់នូវធនធានមនុស្សដ៏កម្រមួយរូប ជាឥស្សរជនដ៏ឆ្នើម ដែលបានលះបង់កម្លាំងកាយ ចិត្ត និងបញ្ញាស្មារតីក្នុងការបម្រើប្រទេសជាតិ មាតុភូមិដោយពុំខ្លាចនឿយហត់រហូតមក។
ក្នុងឱកាសនោះលោករដ្ឋមន្ត្រី បានបួងសួងឱ្យដួងវិញ្ញាណក្ខន្ធសព លោក ងួន ញ៉ិល បានទៅសោយសុខក្នុងឋានសុគតិភពជានិច្ចនិរន្តកុំបីឃ្លៀងឃ្លាតឡើយ។
លោក ងួន ញ៉ិល កើតនៅថ្ងៃទី២២ ខែធ្នូ ឆ្នាំ១៩៤២ នៅស្រុកបារាយណ៍ ខេត្តកំពង់ធំ។ លោកជាសមាជិកគណៈកម្មាធិការអចិន្ត្រៃយ៍របស់គណបក្សប្រជាជនកម្ពុជា ធ្លាប់ជារដ្ឋមន្ត្រីក្រសួងកសិកម្ម ហើយបច្ចុប្បន្នគឺជាអនុប្រធានទី១ នៃសភាជាតិកម្ពុជា៕
